राज्याचे कृषिमंत्री रामविचार नेताम पुन्हा एकदा त्यांच्या वादग्रस्त वक्तव्यामुळे चर्चेच्या केंद्रस्थानी आले आहेत. याआधी सार्वजनिक कार्यक्रमांमध्ये अश्लील नृत्याला “कला” म्हणत त्यांनी वाद ओढवून घेतला होता. आता “प्लास्टिक बाटलीतील दारू कॅन्सर करते की नाही, ते अनुभव घेतल्यावरच सांगेन” असे विधान करून त्यांनी नवा वाद निर्माण केला आहे.
शुक्रवारी कामधेनू विद्यापीठाच्या दीक्षांत समारंभाला उपस्थित राहिल्यानंतर पत्रकारांशी संवाद साधताना त्यांनी हे वक्तव्य केले. दारूच्या आरोग्यावर होणाऱ्या परिणामांबाबत विचारलेल्या प्रश्नावर उत्तर देताना त्यांनी केलेली ही टिप्पणी अनेकांना धक्कादायक वाटली. विशेषतः सार्वजनिक आरोग्य, व्यसनमुक्ती आणि युवकांच्या आरोग्याशी संबंधित गंभीर विषयावर मंत्रीपदावर असलेल्या व्यक्तीकडून अशी विधानं होणं अत्यंत बेजबाबदार असल्याची टीका विविध स्तरातून होत आहे.
आरोग्य तज्ज्ञांनी यावर प्रतिक्रिया देताना सांगितले की, प्लास्टिक बाटल्यांमधील रसायने आणि मद्य यांचा एकत्रित परिणाम आरोग्यास घातक ठरू शकतो, यावर आधीच अनेक वैज्ञानिक अभ्यास उपलब्ध आहेत. अशा पार्श्वभूमीवर “अनुभव घेऊनच सांगणार” असे म्हणणे चुकीचे संदेश देणारे असल्याचे मत व्यक्त करण्यात येत आहे.
विरोधी पक्षांनीही या विधानावर जोरदार टीका केली असून, कृषिमंत्र्यांनी जबाबदारीने बोलावे अशी मागणी केली आहे. युवकांमध्ये व्यसनवाढ रोखण्याऐवजी अशा प्रकारची वक्तव्ये समाजात गैरसमज पसरवणारी असल्याचा आरोप करण्यात आला आहे.
दरम्यान, या प्रकरणावर रामविचार नेताम यांच्याकडून कोणतीही अधिकृत स्पष्टीकरणात्मक भूमिका अद्याप समोर आलेली नाही. मात्र त्यांच्या विधानामुळे पुन्हा एकदा राज्याच्या राजकारणात आणि सामाजिक वर्तुळात खळबळ उडाली असून, आगामी काळात या वक्तव्यावर काय प्रतिक्रिया येतात, याकडे सर्वांचे लक्ष लागले आहे.
