लखनऊ येथे प्रांतीय सशस्त्र दल (PAC) च्या ७८व्या स्थापना दिनानिमित्त आयोजित भव्य कार्यक्रमात जवानांनी असे थरारक आणि अंगावर काटा आणणारे प्रात्यक्षिक सादर केले की, उपस्थित सर्वच जण थक्क झाले. मुख्यमंत्री योगी आदित्यनाथ यांच्या समोर जवानांनी आगच्या जळत्या गोलांतून धावत बाहेर येणे, अवघ्या २ सेकंदांत मल्लखांबची पिरॅमिड रचना करणे आणि कठीण योगासनं क्षणार्धात सादर करणे अशा साहसी कसरती दाखवल्या.
PAC ग्राउंडवर झालेल्या या कार्यक्रमात जवानांच्या शिस्तबद्ध हालचाली, शारीरिक क्षमता आणि मानसिक ताकद यांचे दर्शन घडले. काही जवानांनी स्वतःभोवती पेटवलेल्या आगीच्या गोलांतून निर्भयपणे मार्ग काढत बाहेर येत उपस्थितांना अचंबित केले, तर काहींनी वेगवान हालचालीत मानवी पिरॅमिड उभारून आपला ताळमेळ आणि ताकद सिद्ध केली.
मुख्यमंत्री योगी आदित्यनाथ यांनी या प्रात्यक्षिकांवर उत्स्फूर्तपणे टाळ्या वाजवत जवानांचे मनोबल वाढवले. ते म्हणाले, “हेच जवान केवळ अशा कसरती करत नाहीत, तर गरज पडल्यास दहशतवाद्यांशीही तितक्याच धैर्याने सामना करतात. PAC हे राज्याच्या सुरक्षेचा मजबूत कणा आहे.”
कार्यक्रमाला उपस्थित असलेल्या नागरिकांनीही जवानांच्या प्रत्येक कसरतीनंतर जोरदार टाळ्यांचा कडकडाट केला. PAC च्या इतिहासातील योगदान, अंतर्गत सुरक्षेतील भूमिका आणि आपत्ती व्यवस्थापनातील कामगिरी यांचाही यावेळी आढावा घेण्यात आला. जवानांच्या या प्रात्यक्षिकांनी तरुणांमध्ये देशसेवेची प्रेरणा निर्माण केल्याची भावना अनेकांनी व्यक्त केली.
PAC चा ७८वा स्थापना दिवस हा केवळ उत्सव नसून, शौर्य, शिस्त आणि समर्पणाचे प्रतीक असल्याचे या कार्यक्रमातून पुन्हा एकदा अधोरेखित झाले.
