जळगाव | राष्ट्रवादी काँग्रेस (शरद पवार गट) चे ज्येष्ठ नेते एकनाथ खडसे यांच्या जळगावमधील मुक्ताई बंगल्यात चोरीची धक्कादायक घटना घडली आहे. नुकतेच केंद्रीय मंत्री रक्षा खडसे यांच्या पेट्रोल पंपावर झालेल्या दरोड्यानंतर, आता खडसे यांच्या घरात झालेल्या चोरीमुळे संपूर्ण राजकीय आणि सामाजिक वर्तुळात मोठी खळबळ उडाली आहे.
खडसे यांच्या शिवराम नगर येथील बंगल्यात मध्यरात्री अज्ञात चोरट्यांनी डल्ला मारला असून, या चोरीत सहा ते सात तोळे सोने आणि तब्बल ३५ हजार रुपयांची रोकड चोरीस गेल्याची माहिती पोलिसांनी दिली आहे. सध्या पोलीस घटनास्थळी तपास करत असून, या प्रकरणाचा मागोवा घेण्यासाठी तांत्रिक पुरावे, फॉरेन्सिक तपास आणि परिसरातील सीसीटीव्ही फुटेजचा अभ्यास सुरू आहे.
🔸 घरातील कर्मचाऱ्याने उघड केला प्रकार:
घटनेच्या सकाळी खडसेंच्या घरातील कर्मचाऱ्याने नेहमीप्रमाणे पाहणीसाठी घराकडे गेल्यावर कुलूप तुटलेले आणि घरातील सामान अस्ताव्यस्त अवस्थेत असल्याचे त्याच्या लक्षात आले. तत्काळ त्याने खडसे यांना याची माहिती दिली आणि खडसेंनी लगेचच पोलिसांना कळवले.
🔸 खडसेंचा सरकारवर थेट हल्ला:
घटनेनंतर माध्यमांशी बोलताना खडसे म्हणाले —
“जळगाव जिल्ह्यात पोलिसांचा धाक राहिलेला नाही. चोऱ्या, दरोडे आणि दोन नंबरचे धंदे वाढले आहेत. सरकार आणि पोलिस प्रशासन दोन्हीही या गंभीर घटनांकडे दुर्लक्ष करत आहेत. कोणी टीका केली तर स्थानिक मंत्री त्यावर टिंगल करतात. ही अत्यंत चिंताजनक बाब आहे.”
