पुणे : पुणे महापालिका परिवहन महामंडळ लिमिटेड (PMPML) ने शहरातील प्रवाशांसाठी मोठी आनंदाची बातमी दिली आहे. यशस्वी प्रवासी चाचणीनंतर पुण्यात आणखी १० डबल डेकर इलेक्ट्रिक बस धावणार आहेत. नुकत्याच घेतलेल्या प्रायोगिक धावण्यांना प्रवाशांकडून उत्स्फूर्त प्रतिसाद मिळाल्याने हा निर्णय घेण्यात आला आहे.
पुणेतील चार महत्वाच्या मार्गांवर या बसची चाचणी घेण्यात आली होती. यावेळी प्रत्यक्ष प्रवाशांनी प्रवास केला आणि त्यांच्या अभिप्रायावरून या बस यशस्वी ठरल्या. प्रवाशांनी दिलेला सकारात्मक प्रतिसाद लक्षात घेऊन पीएमपीएमएलने या योजना पुढे नेण्याचा निर्णय घेतला आहे. मंडळाच्या आगामी बैठकीत यावर औपचारिक चर्चा व मंजुरी होणार आहे.
प्रत्येक डबल डेकर इलेक्ट्रिक बसची किंमत सुमारे २ कोटी रुपये असून, दहा बससाठी एकूण २० कोटी रुपयांचा खर्च अपेक्षित आहे. मात्र पीएमपीएमएलने या बस खरेदी न करता ‘भाडेतत्त्वावर’ घेण्याचा निर्णय घेतला आहे. यामुळे मोठा आर्थिक भार टाळला जाणार आहे.
या नव्या बसगाड्यांमध्ये ६५ प्रवासी बसण्याची आणि ८५ प्रवासी उभे राहून प्रवास करण्याची सोय आहे. या पूर्णपणे वातानुकूलित असून, एका चार्जवर तब्बल १५० किमी धावतात. पूर्ण चार्ज होण्यासाठी फक्त दोन तास लागतात. बसची लांबी ९.५ मीटर, रुंदी २.६ मीटर आणि उंची ४.७५ मीटर असल्याने त्या पुण्याच्या विद्यमान रस्त्यांच्या रचनेत सहज बसतील, असे तज्ज्ञांचे मत आहे.
या बसगाड्या स्विच मोबिलिटी कंपनीने तयार केल्या असून, त्यामध्ये सीसीटीव्ही कॅमेरे, डिजिटल तिकिटिंग सिस्टम, आधुनिक सस्पेंशन व आरामदायी प्रवासासाठी आवश्यक सुविधा उपलब्ध आहेत. प्रवाशांना अधिक सुरक्षित आणि सोयीस्कर सेवा देण्यासाठी हा उपक्रम ठरणार आहे.
पीएमपीएमएलच्या संचालक मंडळात पुणे व पिंपरी-चिंचवड महापालिका, पीएमआरडीए, सीआयआरटी आणि प्रादेशिक परिवहन कार्यालयाचे अधिकारी सामील आहेत. या मंडळाच्या बैठकीत अंतिम निर्णय झाल्यानंतर पुणेकरांना या आधुनिक डबल डेकर इलेक्ट्रिक बसचा लाभ घेता येईल.
या बसमुळे पुण्यातील गर्दीच्या मार्गांवरील ताण कमी होईल, नागरिकांना आरामदायी प्रवासाचा अनुभव मिळेल आणि सार्वजनिक वाहतुकीवरील विश्वास वाढेल, असा विश्वास व्यक्त केला जात आहे.
