पुणे – कोथरुड पोलिस ठाण्यात तीन तरुणींवर कथितपणे झालेल्या छळ प्रकरणाने रविवारी रात्री उशिरा मोठं वळण घेतलं. छत्रपती संभाजीनगरहून आलेल्या व्हीआयपी प्रकरणातील तपासदरम्यान संबंधित पोलिसांनी या मागासवर्गीय मुलींवर जातिवाचक शेरेबाजी, मारहाण व लैंगिक अपमान केल्याचा गंभीर आरोप झाला आहे. या प्रकरणात पोलीस यंत्रणेकडून कोणतीही कारवाई होत नसल्याने अखेर आमदार रोहित पवार, सुजात आंबेडकर, अंजली आंबेडकर यांच्यासह अनेक सामाजिक कार्यकर्ते आणि संघटनांचे पदाधिकारी पुणे पोलिस आयुक्तालयात पहाटे साडेतीन वाजेपर्यंत ठाण मांडून बसले होते.
पोलिस आयुक्तालयात अप्पर पोलीस आयुक्त मनोज पाटील आणि अतिरिक्त पोलीस आयुक्त रंजनकुमार शर्मा यांच्यासमवेत यावर विस्तृत चर्चा झाली. मात्र, रविवारी रात्रीपर्यंतही संबंधित पोलिसांविरोधात गुन्हा दाखल करण्यात आलेला नव्हता. राज्य महिला आयोगानेही याप्रकरणाची दखल घेतल्यामुळे आता या प्रकरणात गुन्हा दाखल होणार का, याकडे सर्वांचे लक्ष लागले आहे.
आमदार रोहित पवार यांनी फेसबुकवर पोस्ट करत स्पष्ट शब्दांत संताप व्यक्त केला आहे. त्यांनी म्हटलं की, “या मुलींवर फक्त पोलिसांकडूनच अन्याय नाही झाला, तर प्रशासनाच्या दुर्लक्षामुळे त्यांची मानसिक आणि सामाजिक पिळवणूक सुरू आहे. या मुलींना न्याय मिळवून देण्यासाठी आम्ही शेवटपर्यंत लढू.”
या प्रकारावर कोथरुड पोलीस मात्र स्वतःवरील सर्व आरोप फेटाळत आहेत. पोलीस उपायुक्त संभाजी कदम यांनी यावर प्रतिक्रिया देताना म्हटलं की, “आरोपांची चौकशी केली जाईल आणि जर तथ्य आढळले तर कारवाई नक्कीच केली जाईल.”
🔸 महत्त्वाचे मुद्दे –
पोलिसांकडून कथित जातीवाचक आणि लैंगिक अपमान.
छत्रपती संभाजीनगरचे पोलिस उपनिरीक्षक कामठे यांच्यावर चुकीच्या प्रकारे स्पर्शाचा आरोप.
दोन दिवसांतही गुन्हा दाखल न झाल्याने वाढलेला संताप.
सामाजिक संघटनांचा आणि राजकीय नेत्यांचा सहभाग.
रोहित पवार, सुजात आंबेडकर यांनी घेतली मुलींची भेट.
राज्य महिला आयोगाची दखल.
कारवाई न झाल्यास आंदोलन तीव्र करण्याचा इशारा.
आता प्रश्न आहे – “येत्या २४ तासांत पोलिस प्रशासन या प्रकरणात काय निर्णय घेतं?” – कारण जर कारवाई झाली नाही, तर हे प्रकरण अधिकच पेटण्याची शक्यता आहे.
