पिंपरी चिंचवड, २ जुलै २०२५ : आज सकाळी सुमारे १० वाजताच्या सुमारास, चिंचवड-आकुर्डी मार्गावर धावणाऱ्या पुणे महानगर परिवहन महामंडळाच्या (पीएमपीएमएल) बसवर अचानक एक मोठे झाड कोसळले. या अचानक घडलेल्या घटनेमुळे रस्त्यावरील वाहतूक पूर्णतः ठप्प झाली व प्रवाशांमध्ये काही काळासाठी भीती आणि गोंधळाचे वातावरण निर्माण झाले.
सुदैवाने या घटनेत कोणतीही जीवितहानी झाली नसून एक प्रवासी किरकोळ जखमी झाला आहे. त्याच्यावर घटनास्थळीच तातडीने प्राथमिक उपचार करण्यात आले.
या घटनेची माहिती मिळताच पिंपरी चिंचवड महापालिकेच्या अग्निशमन विभागाच्या नियंत्रण कक्षाशी संपर्क साधण्यात आला. जनता संपर्क अधिकारी प्रफुल्ल पुराणिक यांनी तत्काळ माहिती दिल्यानंतर, मुख्य अग्निशमन केंद्र आणि प्राधिकरण येथून दोन अग्निशमन वाहने काही मिनिटांत घटनास्थळी दाखल झाली.
अग्निशमन जवानांनी अत्यंत शिस्तबद्ध आणि वेगाने बचावकार्य राबवत झाड कापून बाजूला केले व काही वेळातच वाहतूक सुरळीत करण्यात यश मिळवले.
अग्निशमन विभागाचे उपअधिकारी गौतम इंगवले यांनी सांगितले, “घटनास्थळी पोहोचताच सर्वप्रथम आम्ही प्रवाशांची सुरक्षितता तपासली. तत्काळ झाड हटवण्याचे काम हाती घेतले. वेळेवर प्रतिसाद दिल्यामुळे मोठा अनर्थ टळला.”
या घटनेमुळे पुन्हा एकदा आपत्कालीन सेवांतील तत्परता आणि महापालिकेचा सजगपणा अधोरेखित झाला आहे.
पिंपरी चिंचवड महापालिकेचा अग्निशमन विभाग २४ तास कार्यरत असून नागरिकांना कोणताही अपघात, आपत्ती अथवा आणीबाणीची परिस्थिती आल्यास ७०३०९०८९९१ किंवा ७७५७९६६०४९ या क्रमांकावर तात्काळ संपर्क साधण्याचे आवाहन करण्यात आले आहे.
