अहमदनगर जिल्ह्यातील अहिल्यानगर-पुणे महामार्गावर सोमवारी रात्री एक हृदयद्रावक अपघात घडला. आष्टी मतदारसंघाचे भाजप आमदार सुरेश धस यांचा मुलगा सागर सुरेश धस याने चालवत असलेल्या एम.जी. ग्लॉस्टर (MH 23 BG 2929) या कारने एका दुचाकीस्वारास जोरदार धडक दिली. या धडकेत दुचाकीस्वार, हॉटेल व्यावसायिक नितीन प्रकाश शेळके (वय ३४, रा. पळते खुर्द) यांचा मृत्यू झाला.
सुपा पोलीस ठाण्यात याप्रकरणी अपघाताचा गुन्हा दाखल करण्यात आला असून सागर धसला पोलिसांनी ताब्यात घेतले आहे. त्याच्यावर कायदेशीर कारवाई सुरू असून वैद्यकीय तपासणीही करण्यात आली आहे.
घटनास्थळी मिळालेल्या माहितीनुसार, नितीन शेळके हे सह्याद्री खादी हॉटेलवरून आपल्या गावाकडे मोटारसायकलने परत जात असताना त्यांनी महामार्गावरील जातेगाव फाट्याजवळ यु-टर्न घेतला. याच वेळी पुण्याकडे भरधाव वेगाने जाणाऱ्या सागर धसच्या कारने त्यांच्या दुचाकीला जोरदार धडक दिली. या अपघातात नितीन शेळके रस्त्यावर फेकले गेले आणि गंभीर जखमी झाले.
स्थानीय नागरिकांनी तातडीने त्यांना सुपा येथील रुग्णालयात दाखल केले, मात्र डॉक्टरांनी त्यांना मृत घोषित केले. दुसऱ्या दिवशी ८ जुलै रोजी मृतदेहाचे शवविच्छेदन पारनेर ग्रामीण रुग्णालयात करण्यात आले. त्यानंतर मृतदेह नातेवाईकांच्या ताब्यात देण्यात आला आणि पळते येथे अंत्यसंस्कार करण्यात आले.
घटनेची माहिती मिळताच सुपा पोलीस ठाण्याचे सहायक पोलीस निरीक्षक सोमनाथ दिवटे आपल्या पथकासह घटनास्थळी दाखल झाले. त्यांनी सागर धस व त्याच्या मित्राला तातडीने ताब्यात घेतले आणि पुढील तपास सुरू केला आहे.
सागर धस कोण आहे?
सागर धस हा आष्टी विधानसभा मतदारसंघाचे भाजप आमदार सुरेश धस यांचा पुत्र आहे. त्याने विधानसभा निवडणुकीत वडिलांच्या प्रचारात सक्रीय सहभाग घेतला होता. पुण्यात शिक्षण पूर्ण करून, तो सध्या मतदारसंघात युवा नेता म्हणून ओळखला जातो. अनेक सामाजिक उपक्रमांत त्याची उपस्थिती दिसून येते. त्यामुळे या अपघाताने राजकीय वर्तुळातही खळबळ माजली आहे.
कायदेशीर कारवाईची अपेक्षा: या घटनेमुळे स्थानिकांमध्ये संतापाचे वातावरण असून, न्याय मिळावा अशी मागणी मयताच्या कुटुंबियांनी केली आहे. सध्या पोलिसांकडून अपघाताचा तपास सुरू असून, सीसीटीव्ही फुटेज व प्रत्यक्षदर्शींच्या साक्षींच्या आधारे चौकशी केली जात आहे.
