पिंपरी | प्रतिनिधी – पिंपरी-चिंचवड महानगरपालिकेच्या वतीने यंदाच्या आषाढी एकादशीच्या पार्श्वभूमीवर वारकऱ्यांसाठी आरोग्य व स्वच्छतेच्या दृष्टीने अभूतपूर्व आणि व्यापक नियोजन करण्यात आले आहे. ‘स्वच्छ वारी’ या विशेष उपक्रमाद्वारे महापालिकेच्या आरोग्य विभागाच्या पुढाकाराने तसेच विविध स्वयंसेवी संस्थांच्या सहकार्याने वारकऱ्यांसाठी एक आदर्श सेवा संकल्पना प्रत्यक्षात उतरणार आहे.
आषाढी वारीचे भक्तिमय स्वरूप अधिक शिस्तबद्ध, स्वच्छ आणि आरोग्यदायी करण्याचा संकल्प
महापालिकेचे आयुक्त तथा प्रशासक शेखर सिंह यांच्या निर्देशानुसार आणि अतिरिक्त आयुक्त विजयकुमार खोराटे यांच्या मार्गदर्शनाखाली नुकतीच नियोजन बैठक दिवंगत माजी महापौर मधुकर पवळे सभागृहात पार पडली. या बैठकीला आरोग्य विभागाचे उपआयुक्त सचिन पवार अध्यक्षस्थानी होते.
बैठकीस माजी नगरसेवक जयंत बागल, आरोग्य कार्यकारी अधिकारी गणेश देशपांडे, सहाय्यक अधिकारी किशोर दरवडे, राजू साबळे, श्रीराम गायकवाड यांच्यासह विविध आरोग्य अधिकारी, कर्मचारी आणि संस्कार प्रतिष्ठान, वारकरी मंडळ, मराठवाडा सेवा संस्था, राष्ट्रीय स्वयंसेवक संघ, सायकल मित्र मंडळ, संत निरंकारी मंडळ आदी संस्थांचे प्रतिनिधी मोठ्या संख्येने सहभागी झाले.
संपूर्ण वारी मार्गावर आरोग्य व स्वच्छतेसाठी विशेष तयारी
स्वच्छतेच्या दृष्टीने पुढील महत्त्वाच्या बाबींची रूपरेषा यावेळी ठरवण्यात आली:
स्वच्छ व मोफत सार्वजनिक स्वच्छतागृहांची उपलब्धता
जंतूनाशक फवारणी व कीटक नियंत्रण उपाय
पिण्याच्या पाण्याची सुरक्षित सोय
आरोग्य तपासणी व औषध वाटप शिबिरांचे आयोजन
फराळ व आवश्यक खाद्यपदार्थांचे वितरण
विशेष स्वच्छता पथकांची नियुक्ती
स्वयंसेवकांच्या माध्यमातून रस्ते व परिसराची नियमित स्वच्छता
स्वच्छता म्हणजे सेवा – महापालिकेचा संदेश स्पष्ट!
महापालिकेच्या वतीने देण्यात आलेल्या सूचनांनुसार, वारकऱ्यांच्या आगमनापूर्वी आणि प्रस्थानानंतर परिसर पूर्णतः स्वच्छ ठेवण्याचे लक्ष्य ठेवण्यात आले आहे. ही जबाबदारी केवळ पालिकेची नसून नागरिकांनीही यामध्ये पुढाकार घेणे गरजेचे आहे, असे आवाहन आरोग्य उपआयुक्त सचिन पवार यांनी केले.
नागरिक व सेवाभावी संस्थांचा सहभाग हेच यशाचे सूत्र
या उपक्रमामुळे वारकऱ्यांना स्वच्छ, सुरक्षित आणि मनःपूर्वक सेवा मिळणार असून, शहराची सकारात्मक छबी सुद्धा उजळणार आहे. प्रशासनाच्या व स्वयंसेवी संस्थांच्या एकत्रित प्रयत्नांतून वारीच्या सेवेस एक नवीन आयाम प्राप्त होणार आहे.
