दुबईहून पुण्याला आले, पण बॅग दुबईतच राहिली! स्पाइसजेटच्या विमानाने इंधन भारामुळे प्रवाशांचे सामान न नेता केली लँडिंग

पुणे – दुबईहून पुणे विमानतळावर आलेल्या स्पाइसजेटच्या (SG-50) विमानाने प्रवाशांसह लँडिंग केले, मात्र त्यांच्या सामानाशिवाय! गुरुवारी (ता. २६) सकाळी घडलेल्या या घटनेमुळे प्रवाशांमध्ये प्रचंड गोंधळ व नाराजीचे वातावरण निर्माण झाले. विमानतळावर बॅगेज बेल्टजवळ आपले सामान येण्याची प्रतीक्षा करणाऱ्या प्रवाशांना, अखेर “सामान आलंच नाही” अशी धक्कादायक माहिती मिळाली.

सामान का ठेवण्यात आलं ?
स्पाइसजेटकडून देण्यात आलेल्या प्राथमिक माहितीनुसार, विमानातील इंधन साठा वाढवण्यात आल्यामुळे एकूण वजनमर्यादा पार झाली होती. त्यामुळे सुरक्षेच्या दृष्टीने निर्णय घेत प्रवाशांचे सामान घेण्यात आले नाही. कंपनीने असेही सांगितले की, संपूर्ण सामान दुसऱ्या विमानाने पाठवण्यात येईल.

प्रवाशांचा संताप अनावर:
सकाळपासून बेल्टजवळ थांबूनही एकाही प्रवाशाचा बॅगेज न आल्याने अनेक प्रवासी भडकले. त्यानंतर स्पाइसजेटच्या ग्राऊंड स्टाफकडे चौकशी केली असता, हा सगळा प्रकार उघडकीस आला. “प्रवास करून आलो पण कपडे, औषधं, कागदपत्रं सगळं सामान दुबईतच राहिलं, आता आमचं काय?” अशी प्रतिक्रिया अनेक प्रवाशांनी दिली.

स्पाइसजेटकडून आश्वासन:
कंपनीने सांगितले की, “सर्व सामान तातडीने दुसऱ्या फ्लाइटने पाठवण्यात येईल आणि प्रवाशांना त्यांच्या पत्त्यावर ते पोहोचवण्यात येईल.” मात्र, अनेक प्रवाशांनी कंपनीच्या नियोजनशून्यतेवर नाराजी व्यक्त करत सुरक्षा कारणांची आडवा घेत ‘गैरव्यवस्थापन’ लपवण्याचा प्रयत्न असल्याची टीका केली.

हवाई वाहतूक क्षेत्रात गंभीर प्रश्न:
या घटनेमुळे एक गंभीर प्रश्न उपस्थित होतो – इंधन व वजन यांचे नियोजन करताना प्रवाशांच्या मालमत्तेचा विचार न करता निर्णय घेणे कितपत योग्य? हवाई सुरक्षेच्या दृष्टीने निर्णय घेणे गरजेचे असले तरी, प्रवाशांचे मालमत्तेसह आगमन सुनिश्चित करणे हीही तितकीच महत्त्वाची जबाबदारी आहे.

 महत्त्वाचे मुद्दे:

दुबईहून पुण्याला आलेल्या SG-50 फ्लाइटने प्रवाशांचे सामान न घेता लँडिंग

इंधनाच्या भारामुळे वजन मर्यादा पार; सामान दुबईतच ठेवले

प्रवाशांमध्ये गोंधळ, नाराजी; अनेकांनी सोशल मीडियावर व्यक्त केला संताप

स्पाइसजेटने दुसऱ्या फ्लाइटने सामान पाठवण्याचं दिलं आश्वासन

विमान कंपनीच्या नियोजनावर प्रश्नचिन्ह