जागतिक अंमली पदार्थ विरोधी दिनानिमित्त लोणावळा पोलीसांना सर्वपक्षीय कार्यकर्त्यांकडून निवेदन सादर!

लोणावळा | २६ जून २०२५ :- जागतिक अंमली पदार्थ विरोधी दिनाचे औचित्य साधून, लोणावळा शहरातील विविध पक्षांचे कार्यकर्ते, सामाजिक संस्था, नगरसेवक आणि नागरिक प्रतिनिधींनी एकत्र येत लोणावळा शहर व ग्रामीण पोलीस निरीक्षकांना निवेदन सादर केले. या निवेदनाद्वारे शहरात वाढत चाललेल्या अंमली पदार्थांच्या सेवन व विक्रीच्या गंभीर समस्येकडे लक्ष वेधण्यात आले.

अंमली पदार्थ विक्रीचं खुलेआम जाळं?

निवेदनात स्पष्ट करण्यात आलं आहे की, लोणावळा व आजूबाजूच्या भागांमध्ये खुलेआम गांजा, ब्राउन शुगर, इग्स यांची देवघेव होत असून तरुणवर्ग मोठ्या प्रमाणात या व्यसनात अडकत आहे. या समस्येमुळे गुन्हेगारी, चोरी, मारामारी यासारख्या घटनांमध्ये वाढ होत आहे.

युवकवर्ग संकटात – समाजासमोर आव्हान

अंमली पदार्थांच्या आहारी गेलेल्या तरुणांचे आरोग्य ढासळत असून, शाळा-महाविद्यालयांचे शैक्षणिक वातावरण बिघडत आहे. या सापळ्यातून त्यांचे भविष्य अंधारमय होत असल्याची खंत निवेदनात व्यक्त करण्यात आली आहे.

प्रस्तावित उपाययोजना – ठोस कृतीची मागणी

सर्वपक्षीय कार्यकर्त्यांनी पोलीस प्रशासनाकडे पुढील ठोस उपाययोजनांची मागणी केली आहे: २६ जून रोजी विशेष जनजागृती मोहीम राबवावी. संवेदनशील भागांमध्ये गस्त वाढवावी आणि गुप्त माहिती संकलन मोहीम सुरू करावी. शैक्षणिक संस्थांमध्ये व्याख्याने, कार्यशाळा, चित्रफिती दाखवाव्यात. एनजीओ, युवक मंडळे, पालक यांचा सहभाग घेऊन “अंमली पदार्थमुक्त शहर” अभियान राबवावा. अंमली प्रकरणांमध्ये कठोर कारवाई व कायदेशीर प्रक्रिया राबवाव्यात. अवैध धंद्यांवर लक्ष ठेवण्यासाठी विशेष गुप्त यंत्रणा सक्रिय करावी.

सर्वपक्षीय नेतृत्व एकवटले

या निवेदनावर राष्ट्रवादी काँग्रेसचे अध्यक्ष विलास बडेकर, शिवसेनेचे प्रमुख परशुराम दाडेकर, मनसे अध्यक्ष निखील भोसले, भाजप प्रतिनिधी, नगरसेवक, तसेच आरपीआय (A) शहरप्रमुख यांच्या स्वाक्षऱ्या असून, एकत्रितपणे शहरातील तरुणांचा प्रश्न सोडवण्यासाठी ठोस कृतीची मागणी करण्यात आली आहे.

पोलिसांवर विश्वास, कृतीची अपेक्षा “पोलीस विभागाने समाजातील व्यसनमुक्तीसाठी ठोस पावले उचलावीत. ही केवळ प्रशासनाची नाही तर संपूर्ण समाजाची जबाबदारी आहे,” असे आवाहन निवेदनाद्वारे करण्यात आले आहे.