पुणे : पुणे शहर पोलिसांच्या विशेष पथकाने तडीपार गुंडांवर कारवाई करत पुणे शहरात धडक कार्यवाही केली. २५ एप्रिल २०२५ रोजी खंडणी विरोधी पथक १ आणि गुन्हे शाखेच्या पथकाने पर्वती पोलीस ठाणे परिसरात एक मोठी कारवाई केली. वरिष्ठ पोलिस निरीक्षक शैलेश संखे यांच्या मार्गदर्शनाखाली ही कार्यवाही करण्यात आली.
सपोनि राजेश माळेगावे आणि त्यांच्या पथकाला गुप्त बातमीदारांकडून मिळालेल्या माहितीनुसार, गणेश वाघमारे, जो मोक्कयामध्ये सुटलेला आरोपी आहे, त्याच्याकडे गावठी पिस्टल असून, त्याने दांडेकर पूल परिसरात दहशत पसरवून सार्वजनिक सुव्यवस्था धोक्यात आणण्याचा प्रयत्न केला होता. यानंतर, पोलिसांनी गणेश वाघमारे यास ताब्यात घेतले आणि त्याच्या अंगझडतीतून त्याच्याकडे बेकायदेशीर पिस्टल जप्त केली.
त्यानंतर, तपासाच्या दरम्यान, आरोपीने सांगितले की, या पिस्टलला त्याचे मित्र तेजस काशीनाथ शेलार याने विकत घेतले होते. त्यानुसार, तेजस शेलार याच्यावर तपास सुरू करण्यात आला. तेजस शेलार याच्या अंगझडतीत त्याच्या पॅन्टमध्ये एक सिल्व्हर रंगाची गावठी पिस्टल व त्याचे मॅगझिनमध्ये २ जिवंत काडतुसे आढळले. याची एकूण किंमत ३५,४०० रुपये आहे.
दोन्ही आरोपींनी पिस्टल बाळगण्यास परवाना नसल्याचे कबूल केले. यावर, पर्वती पोलीस ठाणे व सिंहगडरोड पोलिस ठाणे यांच्या रेकॉर्डवरील गुन्हेगारांविरोधात गुन्हा नोंदवला गेला आहे. दोन्ही आरोपींना अटक करण्यात आली असून, पुढील तपास पर्वती पोलीस ठाण्यात सुरू आहे.
सदर कामगिरी पुणे शहराचे पोलिस आयुक्त श्री. अमितेश कुमार, पोलिस सह आयुक्त श्री. रंजनकुमार शर्मा आणि अपर पोलिस आयुक्त श्री. शैलेश बलकवडे यांच्या मार्गदर्शनाखाली केली गेली.
