पुणे: पुणे जिल्हाधिकारी कार्यालयासमोर खासदार सुप्रिया सुळे यांनी आज (दि. ९ एप्रिल) सकाळी १० वाजल्यापासून ठिय्या आंदोलन सुरू केले आहे. गेल्या तीन तासांपासून त्या कडक उन्हात बसून असूनही प्रशासनाकडून कोणतीही दखल घेतली गेलेली नाही. भोर तालुक्यातील श्री क्षेत्र बनेश्वर येथील बनेश्वर फाटा ते वनविभाग कमान या पवित्र देवस्थानकडे जाणाऱ्या रस्त्याची अत्यंत दयनीय अवस्था झाल्याने या रस्त्याच्या त्वरित दुरुस्तीसाठी त्यांनी हे आंदोलन छेडले आहे.
रस्त्याच्या दुरवस्थेवर प्रशासनाकडून दुर्लक्ष
श्री क्षेत्र बनेश्वर हे धार्मिक आणि सांस्कृतिक दृष्टिकोनातून अत्यंत महत्त्वाचे स्थळ आहे. येथे दरवर्षी हजारो भाविक दर्शनासाठी येतात. मात्र, बनेश्वर फाटा ते वनविभाग कमान या रस्त्याची परिस्थिती अत्यंत खराब असून वाहनचालक आणि पादचाऱ्यांना मोठ्या त्रासाला सामोरे जावे लागत आहे. प्रशासनाने अनेक वेळा डेडलाइन जाहीर केल्या, मात्र अद्याप कोणतेही काम सुरू झालेले नाही.
सुळे यांनी सरकारला सुनावले:
सुप्रिया सुळे यांनी आंदोलनादरम्यान प्रशासनावर जोरदार हल्लाबोल केला. त्यांनी सांगितले की,
“या देशात करोडो रुपये खर्च करून मेट्रो होते, बुलेट ट्रेन येते, मात्र दीड किलोमीटरचा रस्ता दुरुस्त होत नाही, हे अत्यंत दुर्दैवी आहे. गेले सहा महिने आम्ही या रस्त्यासाठी पाठपुरावा करत आहोत, परंतु प्रशासन आमच्याकडे दुर्लक्ष करत आहे. भाविकांचे हाल होत आहेत, स्थानिक लोकांचा संताप वाढत आहे. पण तरीही प्रशासनाकडून कोणतीही ठोस पावले उचलली जात नाहीत. आम्ही वारंवार रस्ता दुरुस्तीची मागणी करत आहोत, मात्र आम्हाला केवळ ‘तारीख पे तारीख’ दिली जात आहे.”
आंदोलनासाठी मोठ्या प्रमाणात लोकांचा पाठिंबा
सुळे यांच्या आंदोलनाला मोठ्या प्रमाणात स्थानिक नागरिक, सामाजिक कार्यकर्ते आणि राष्ट्रवादी काँग्रेसचे कार्यकर्ते पाठिंबा देत आहेत. पुण्यातील नागरिकांनीही या आंदोलनाला पाठिंबा देत प्रशासनाला लवकर निर्णय घेण्याची मागणी केली आहे.
प्रशासनाने ठोस निर्णय न घेतल्यास आंदोलन तीव्र करण्याचा इशारा
“जोपर्यंत बनेश्वर रस्त्याच्या विषयावर प्रशासन ठोस भूमिका घेत नाही, तोपर्यंत आम्ही आंदोलन मागे घेणार नाही,” असा इशारा सुप्रिया सुळे यांनी दिला आहे. प्रशासनाने जर लवकरात लवकर योग्य पावले उचलली नाहीत, तर हे आंदोलन आणखी तीव्र करण्यात येईल, असेही त्या म्हणाल्या.
मुख्यमंत्री आणि प्रशासनाकडून प्रतिसादाची प्रतीक्षा
मुख्यमंत्री देवेंद्र फडणवीस आणि पुणे महापालिकेच्या प्रशासनाकडून या आंदोलनावर अद्याप कोणताही अधिकृत प्रतिसाद आलेला नाही. मात्र, नागरिक आणि भाविकांच्या वाढत्या असंतोषामुळे लवकरच प्रशासनाकडून निर्णय घेतला जाण्याची शक्यता आहे.
