पुण्यात रंगला वसंतोत्सव! पारंपरिक लोककला, स्त्रीशक्तीचा गौरव आणि सांस्कृतिक वारशाचे दर्शन

पुणे | २६ एप्रिल २०२५ :- फोकलोर ॲन्ड कल्चरल हेरिटेज फाउंडेशन, पुणे यांच्या वतीने “एक दिवसीय वसंतोत्सव” चे आयोजन श्रमिक पत्रकार भवन, पुणे येथे मोठ्या उत्साहात पार पडले. वसंताच्या आगमनानिमित्त पारंपरिक लोककलांचे सादरीकरण, स्त्रीशक्तीचा सन्मान आणि संस्कृतीचा जागर यामध्ये उत्सवाने खऱ्या अर्थाने महाराष्ट्राच्या सांस्कृतिक समृद्धीचा ठेवा साजरा केला.

 वसंतोत्सवाची सुरुवात : दीपप्रज्वलन आणि चैत्रांगण पूजनाने

कार्यक्रमाची सुरुवात सावित्रीबाई फुले पुणे विद्यापीठाच्या ललित कला केंद्राचे प्रमुख डॉ. प्रवीण भोळे यांच्या हस्ते दीपप्रज्वलनाने झाली. उपस्थित प्रमुख पाहुण्यांमध्ये डॉ. जितेंद्र पानपाटील, प्रा. शैला खांडगे, डॉ. सुनीता धर्मराज यांचा समावेश होता. यानंतर पारंपरिक चैत्र गौरी पूजन, म्हणजेच चैत्रांगणाचे पूजन अत्यंत भक्तिभावाने पार पडले.

पारंपरिक लोककलांचे बहारदार सादरीकरण

कार्यक्रमाच्या दुसऱ्या सत्रात डॉ. सुखदा खांडगे यांनी कथ्थक नृत्य, तर गौरी वनारसे व निकिता बहिरट यांनी संबळ वादनातून देवीचे जागरण सादर केले. यानंतर अश्विनी छत्रपती आणि त्यांच्या सहकाऱ्यांनी स्त्रियांचे पारंपरिक खेळ – फुगडी, भोंडला, मंगळागौरी च्या माध्यमातून जुन्या परंपरांना नवसंजीवनी दिली.
रेश्मा परितेकर यांनी आपल्या बहारदार लावणी सादरीकरणाने उपस्थितांची मने जिंकली.

स्त्रीशक्तीचा गौरव : विविध क्षेत्रातील महिलांचा सत्कार

वसंतोत्सवाच्या निमित्ताने विविध माध्यमांमध्ये कार्यरत असलेल्या महिलांचा सन्मान करण्यात आला. भाग्यश्री देसाई, नीलिमा पटवर्धन, संध्या पुजारी, ममता सपकाळ यांना विशेष सन्मान प्रदान करण्यात आला. त्यांचा यशस्वी प्रवास नव्या पिढीसाठी प्रेरणादायी ठरला.

 विचारप्रवर्तक भाषण : “माती, नीती आणि संस्कृतीचा हात सुटू देऊ नका”

कार्यक्रमाच्या विशेष चौकट भाषणात ममता सिंधुताई सकपाळ म्हणाल्या, “वसंतोत्सवात पारंपरिक लोककलेला मिळालेला उजाळा मनाला आनंद देणारा आहे. आपल्या माती, नीती आणि संस्कृतीचा हात सुटता कामा नये. ही नाळ कायम जपली गेली पाहिजे, तरच आपली ओळख टिकून राहील.”

आयोजकांची भूमिका :

कार्यक्रमाचे प्रास्ताविक आणि वसंतोत्सवाचे आयोजन फाउंडेशनच्या संचालक डॉ. सुनीता धर्मराज यांनी केले. त्यांनी सांगितले की, “महाराष्ट्राला लाभलेल्या लोककलेच्या वारशाचे जतन व संवर्धन हे आमचे ध्येय आहे. वसंतोत्सवासारख्या उपक्रमांमधून आपण लोककलेच्या मूळ तत्वांना नव्या पिढीत पोहोचवतो.”

 सूत्रसंचालन :

कार्यक्रमाचे सूत्रसंचालन तन्मयी जोशी यांनी अत्यंत प्रभावीपणे केले.

 उत्सवाचा सारांश :

हा उत्सव म्हणजे संस्कृती, परंपरा, कला आणि स्त्रीशक्ती यांचा सुंदर संगम होता. पारंपरिक कला आणि लोकपरंपरेचा गौरव करताना, फाउंडेशनने समाजाला पुन्हा एकदा आपल्या मूल्यांची आठवण करून दिली.