पुणे : पुण्यातील एका प्रामाणिक रिक्षाचालकाने प्रवासी महिलेची साडेआठ तोळे सोने असलेली बॅग परत केल्याने त्याच्या इमानदारीचे सर्वत्र कौतुक होत आहे. राजाभाऊ चंद्रकांत रासकर असे या रिक्षाचालकाचे नाव असून, त्यांच्या या प्रामाणिक कृतीने समाजात आदर्श निर्माण केला आहे.
घटनेचा तपशील:
मंगळवारी सकाळी ८ वाजता पानमळा ते स्वारगेट प्रवास करताना एका महिलेची महत्त्वाची बॅग रिक्षामध्ये विसरली गेली. सदाशिवपेठेत पोहोचल्यानंतर राजाभाऊ यांच्या लक्षात आले की, एक बॅग रिक्षामध्ये विसरली आहे. त्यांनी तत्काळ ती बॅग स्वारगेट पोलिस चौकीत जमा केली.
स्वारगेट पोलिस ठाण्यात आधीच महिलेने हरवलेल्या बॅगेची तक्रार नोंदवली होती. पोलिसांनी महिलेला चौकीत बोलावून बॅग तपासली असता, त्यामध्ये साडेआठ तोळे सोने असल्याचे निष्पन्न झाले. बॅग आणि त्यातील सर्व ऐवज महिलेच्या ताब्यात सुरक्षितपणे देण्यात आला.
रिक्षाचालकाचा सन्मान:
रिक्षाचालक राजाभाऊ रासकर यांच्या प्रामाणिकपणाचा गौरव करण्यासाठी स्वारगेट पोलिस ठाण्यात त्यांचा शाल व श्रीफळ देऊन सन्मान करण्यात आला. या वेळी पोलीस उपनिरीक्षक बाळू सिरसट, अंमलदार अमोल काटे, आणि प्रभाकर सोनवणे हे अधिकारी उपस्थित होते.
रिक्षाचालकांची प्रतिक्रिया:
राजाभाऊ रासकर म्हणाले, “आमच्या घरात नेहमी शिकवले गेले आहे की, दुसऱ्यांच्या वस्तूंना हात लावू नये. त्यानुसार मी बॅग थेट पोलिसांकडे जमा केली. मला माहित नव्हते की त्यामध्ये एवढे महत्त्वाचे ऐवज आहे. पोलिसांनी माझ्या कामाचा सन्मान करून आदर्श निर्माण केला आहे. अशा कामाची पोचपावती मिळाल्याचा मला आनंद आहे.”
